一位太太拎藥後，行咗去坐低檢查吓啲藥～睇睇吓突然大嗌:小姐！小姐！
低頭族嘅我立即抬頭:係！乜事？
太太:呢啲藥唔係我㗎！
我:你俾我睇吓～
太太可能腳痺或者用AA膠痴住咗屎忽，佢居然一嘢飛包藥埋嚟，好彩我都食過吓夜粥接得住～我對一對醫生開嘅藥單同佢包藥，發現……根本冇錯～
我:包藥係你㗎，冇問題呀～
太太:我唔係要呢啲藥呀！
我:你想要乜藥呀？
太太:我同醫生講咗我要上次嗰啲呀嘛！
我:呢啲係跟返上次啲藥嚟開㗎，一樣㗎～
太太谷到面都紅哂咆哮:唔係呢啲呀！！！！
我都好想趁墟谷埋一份咆哮「都話係呢啲囉！！！！你唔食就罷撚就！！」，呢個反應完全係我夢想…
現實中我只可以:係呢啲啊～醫生已經核對清楚啲藥啊，你可以放心～
太太:你聽唔聽得明人話呀？
汪汪汪汪汪汪汪汪汪汪！ 汪汪汪汪汪汪汪汪汪汪！喵喵喵喵喵喵喵喵喵喵喵喵喵喵喵喵～～ 汪汪汪汪汪汪汪汪汪汪！ 汪汪汪汪汪汪汪汪汪汪！喵喵喵喵喵喵喵喵喵喵喵喵喵喵喵喵～～ 汪汪汪汪汪汪汪汪汪汪！ 汪汪汪汪汪汪汪汪汪汪！喵喵喵喵喵喵喵喵喵喵喵喵喵喵喵喵～～
我:我係地球人
太太好激動咁摷佢手袋，一邊摷一邊講:講極都唔明，蠢到咁，話咗唔係呢啲就唔係呢啲啦！係要搞到人發哂脾氣先得㗎！我醒目仲有留返一次藥！
佢摷到一袋藥之後，同樣飛袋藥俾我:你睇吓呀！！！！我要係呢啲呀！
我望一望:嗯，你可以直行兩個街口左轉過馬路去對面呀～
太太:講乜呀你？
我展示佢掟俾我啲藥:你肯定係要配呢啲嗎？
太太:我一直都係講要呢啲，上次嗰啲呀嘛！係呢啲呀！你唔識聽人話呀？
我:我識聽～～你直行兩個街口左轉過馬路去對面呀～你呢啲藥係另一間診所嘅…我哋診所唔會配到另一個醫生開嘅藥啊，咁我而家退返錢俾你先啊～
太太呆一呆，拎返錢後，一路走一路講:好心你門口就印大啲個醫生名啦！鬼知你係邊個咩？
係啦係啦，唔好嬲啦～嬲豬唔pretty呀～
Search